ԿԱՌԱՎԱՐՈՒԹՅՈՒՆԸ ՊԱՏԳԱՄԱՎՈՐՆԵՐԻՆ ՀՐԱՀԱՆԳԵԼ Է ԴՈՒՐԵԿԱՆ ՀԱՐՑԵՐ ՈՒՂՂԵԼ

1

Ազգային ժողով-կառավարություն հարցուպատասխանի ժամանակ ընդդիմադիրները հերթական անգամ փորձեցին վարչապետ Նիկոլ Փաշինյանին նեղը գցող հարցեր ուղղել: Թեեւ իշխանականների խիստ ջղաձգումներին, որ ընդդիմադիրները Փաշինյանին հանկարծ ու հանկարծ կապիտուլյանտ կամ դավաճան չանվանեն, այնուամենայնիվ, դաշնակցականները դրանք արտաբերելու ձեւը գտան:

Ի տարբերություն ընդդիմադիրների, խորհրդարանի մեծամասնությանՙ «Քաղաքացիական պայմանագիր» խմբակցության պատգամավորների հարցերը ոչ միայն որեւէ խնդրի կամ հարցի բարձրաձայնում չէին, այլեւ կառավարական կաբինետի անդամներին ինքնադրսեւորվելու լավ առիթ էին տալիս:

«Ազգ»ի տեղեկություններովՙ գործադիրից նախապես հարցերը գրել ու իշխանական երեսփոխանների ձեռքն են տվել, որպեսզի նրանք իրենց խիստ կարեւոր այցերի մասին պատմեն: Մարիա Կարապետյանն, օրինակ, արտաքին գործերի նախարար Արարատ Միրզոյանից հետաքրքրվում էրՙ ի՞նչ կպատմի Իրան կատարած այցից: ՔՊ խմբակցության քարտուղար Նազելի Բաղդասարյանը Միրզոյանին խնդրում էր մանրամասնելՙ ի՞նչ է խոսել Ադրբեջանի արտգործնախարարի հետ:

Մեծամասնության պատգամավորներից մեկն էլ առողջապահության նախարարից հետաքրքրվում էր, թե Հայաստանում քանի՞ տեսակի պատվաստանյութ կա:

Անգամ ինձՙ որպես լրագրողի, երբեք չեն հետաքրքրի վերոնշյալ հարցերի պատասխանները, քանի որ դրանց մասին նախարարության լրատվական ծառայությունները բավական հանգամանալից ծանուցում են, հաղորդագրություններ տարածում: Հասկանալի է, որ թիմակիցների «թասիբը» պահելու ու նրանց օգնելու հարց ունեն իշխանության անդամները, բայց անգամ դա աննկատ ու աչքի չզարնող ձեւով անելու հմտություններին չեն տիրապետում: Արարատ Միրզոյանը գերազանցիկ աշակերտի էր նման, որին ուսուցիչը մեկ օր առաջ էր զգուշացրելՙ դաս է հարցնելու: Նա էլ դասն անգիր արել, եկել ու հպարտանում էր դասարանի առջեւ: