RSS | WAP | FACEBOOK | PDF | PDF-Culture
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#006, 2018-02-16 > #007, 2018-02-23 > #008, 2018-03-02 > #009, 2018-03-09 > #010, 2018-03-16

«ԱԶԳ» ՕՐԱԹԵՐԹ #8, 02-03-2018



ՀԵՏԱԳԻԾ

Տեղադրվել է` 2018-03-01 23:20:59 (GMT +04:00)


Ընթերցված է` 3455, Տպվել է` 454, Ուղարկվել է էլ.փոստով` 0

ԳՐԱԿԱՆՈՒԹՅՈՒՆԸ ՄԵՌՆՈՒՄ Է, ՈՒՌԱ՜

ՀՈՎԻԿ ԱՖՅԱՆ

Բոլորովին վերջերս, փետրվարի 27-ին, «Դինամո» մարզասրահում մի խումբ ոստիկաններ պարգեւատրվել են: Ոչ թե ձկներին բռնելիսՙ մեծ ու փոքր չանելու համար, ոչ էլ Հայաստանի բոլոր մարդասպաններին ու ավազակներին ձերբակալելու, այլՙ ֆիզկուլտուրայում ցուցաբերած բարձր առաջադիմության համար: Սա շատ կարեւոր է, քանի որ եթե ոստիկանը հանկարծ ֆիզկուլտուրայից չցուցաբերի բարձր առաջադիմություն, ապա կունենա հաստ փոր, ինչը զգալիորեն կնվազեցնի նրա վազելու հնարավորությունները, ինչի հետեւանքով էլ ոչ միայն մանր ձկները ողջ կմնան, այլեւ խոշորներըՙ կուշտ, բացի այդ ոչ մի մարդասպան ու ավազակ չի ձերբակալվի: Այնպես որ, շնորհավորում ենք մեր ոստիկաններին ու նաեւ մեզ, ֆիզկուլտուրայի բնագավառում առաջինների ցուցաբերած բարձր առաջադիմության համար: Ուռա՜:

Եւ սա պատահական չէ, նկատի ունեմ ֆիզկուլտուրայի հանդեպ մեր ոստիկաններիՙ հանկարծ բորբոքված անհագուրդ սերը: Բանն այն է, որ հատկապես իր հանձնարարականներով հայտնի ՀՀ վարչապետ Կարեն Կարապետյանը փետրվարի 26-ին (ֆիզկուլտուրայի բնագավառում ոստիկանների ցուցաբերած բարձր առաջադիմության նախորդ օրը), մարզային այցելությունների շրջանակներում Լոռիի մարզում էր: Դե, քննարկել են մարզի կատարողականը, վարչապետը հիշեցրել է իր հանձնարարականները, լոռեցիները հպարտորեն նշել են, որ դրանց մեծ մասը կատարման փուլում է, ներկայացրել են իրենց մարզիՙ գրեթե Սինգապուրին հասնող տնտեսական աճի տեմպերը, մի խոսքովՙ լավ զրուցել են: Ու հանկարծ վարչապետը որոշել է, որ ինքը հենց այդ պահին ու հենց Լոռիում պետք է ներկայացնի ՀՀ վաղվա քաղաքացու իր պատկերացումները: Ընդ որում, վարչապետին որեւէ մեկը չի հարցրել, թե պարոն վարչապետ, այ օրինակ Դուք ինչպե՞ս եք պատկերացնում Հայաստանի վաղվա քաղաքացուն: Մարդը ուղղակի որոշել է, որ պետք է ասի ու ասել է հետեւյալը. «Ինչպիսին եմ պատկերացնում մեր վաղվա քաղաքացուն: Մեր երեխան անպայման պետք է առողջ լինի, դրա համար ֆիզկուլտուրան չափազանց կարեւոր է: Հայաստանի քաղաքացին պետք է առնվազն երեք լեզու իմանա, ոչ թե որովհետեւ մոդայիկ է, այլ դա դառնալու է խիստ անհրաժեշտ: Մենք պետք է կարողանանք դպրոցում երեխաներին սովորեցնել բնական գիտություններ, ֆիզկուլտուրա, ՏՏ, ռոբոտատեխնիկա, բիզնես եւ ֆինանսական մտածելակերպ»: Այսքանը, այսինքն վարչապետն այս թեմայի շուրջ էլ բան չի ասել: Ու մինչ պարզ է դառնում, թե ինչո՞ւ էին հաջորդ օրը մեր ոստիկանները փորձում աչքի ընկնել ֆիզկուլտուրայի բնագավառում, ասեմ, որ պարոն վարչապետի նշած բոլոր բաներն էլ կարեւոր են ու շատ ճիշտ է, որ մեր դպրոցներում մեր երեխաներն այդ ամենը սովորեն (հիմա փաստորեն, չենք կարողանում սովորեցնել, վարչապետն է ասել), բայց հարգելի վարչապետը չի՞ մոռացել ամենակարեւորը, նկատի ունեմՙ Հայաստանի վաղվա քաղաքացուն նկարագրելիս: Բա հայոց լեզո՞ւն, գրականությո՞ւնը, պատմությո՞ւնը, դրանք խիստ անհրաժեշտ չե՞ն դառնալու, գոնե մոդայիկ չե՞ն, օրինակ նույն Լոռիում վարչապետը չէ՞ր կարող ասել, որ մեր երեխանՙ Հայաստանի վաղվա քաղաքացին, ռոբոտատեխնիկայից գերազանց ստանալուց բացի պետք է նաեւ իմանա, թե Անուշն ո՞վ է գրել, Լոռեցի Սաքոն ինչո՞ւ խելագարվեց, մանկահասակ Մարոյին ինչո՞ւ նշանեցին, Գիքորն ինչո՞ւ մահացավ,...: Լավ, կարելի է ու պետք է զարգացնել բնական գիտություններն ու մանավանդ դրանց դասավանդման ձեւն ու տեմպը, բայց հումանիտարների հաշվի՞ն, իսկ չե՞նք վախենում, որ Հայաստանի վաղվա քաղաքացին կարող է խոսել երեք լեզվով, քիմիայից Նոբելյան մրցանակակիր լինել, կարատեից սեւ գոտի ունենալ, դեղերի լավ բիզնես, բայց լինել հանձնարարականներ կատարող եւ կանխատեսելի-ծրագրավորած համապետական ընտրության գնացող ռոբոտ: Գուցե նպատակը հենց դա՞ է...

Ամեն դեպքում գրականությունն օգնում է, որ մարդը ռոբոտ չդառնա, վաղվա Հայաստանում է՛լ չի օգնելու:

Կեցցե՛ այն Հայաստանը, որն այսօր է եկել:

 
 

«ԱԶԳ» ՕՐԱԹԵՐԹ #8, 02-03-2018

AZG Daily #35, 21-09-2018

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ