RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

WWW.AZGONLINE.AM
2020-10-20 14:48:57ԵԽ հույն պատգամավորը կոչ է արել վիզային սահմանափակումներ մտցնել ադրբեջանցիների համար եւ վիզաների չեղարկում՝ հայերի համար
2020-10-18 11:53:59Ադրբեջանցիները հայ երիտասարդին ներկայացնում են որպես վարձկան
2020-10-17 20:20:41“Որտեղից Հայաստանին այսքան զենք” Ալիև
2020-10-17 16:50:17Սուտ է. ՀՀ-ը մաքսանենգ ճանապարհով քաղաքացիական ինքնաթիռներով զինամթերք չի տեղափոխել
2020-10-17 09:58:11Ադրբեջանական ԱԹՍ-ները հարվածել են ՀՀ տարածքին
#035, 2014-11-07 > #036, 2014-11-14 > #037, 2014-11-21 > #038, 2014-11-28 > #039, 2014-12-05

«ԱԶԳ» ՕՐԱԹԵՐԹ #37, 21-11-2014



ՆԵՑՈՒԿ` ՈՒՍՈՒՑՉԻՆ

Տեղադրվել է` 2014-11-20 23:12:07 (GMT +04:00)


Ընթերցված է` 1516, Տպվել է` 19, Ուղարկվել է էլ.փոստով` 8

«ՉԱՓԱԶԱՆՑ ՀԱՃԵԼԻ Է, ԵՐԲ ՄԱՐԴՈՒ ԱՇԽԱՏԱՆՔԸ ԳՆԱՀԱՏՈՒՄ ԵՆ»

ԱՂՎԱՆ ԱՍՈՅԱՆ

ԹՄՄ «Ուսուցիչ մը հովանավորէ» բարեգործական նախաձեռնությունը Քաշաթաղում ու Երեւանում

Ինչպես տեղեկացրել էինք մեր նախորդ թղթակցության մեջ, Թեքեյան մշակութային միությունը, իր այս տարվա «Ուսուցիչ մը հովանավորե» բարեգործական նախաձեռնությունը պետք է ավարտեր Երեւանում եւ ԼՂՀ Քաշաթաղի շրջանի Բերձոր քաղաքում:

Առաջին կանգառն Արցախն էր: Հոկտեմբերի 31-ին ԹՄՄ-ի անձնակազմին մեծ ուրախությամբ դիմավորեցին Բերձորի թիվ 1 դպրոցում: Սակայն այցն անակնկալներով լի էր նաեւ թեքեյանցիների համար: Առաջինըՙ տեղական ինքանակառավարման մարմինները նորոգել էին սարի գագաթին գտնվող դպրոցի աստիճանները: Մինչ այդ, թե երեխաները եւ թե ուսուցիչները դպրոց հասնելու համար ստիպված էին բազում փորձություններ հաղթահարելՙ բառի բուն իմաստով:

Երկրորդ անակնկալն այն էր, որ դպրոցն ընդգրկվել է ԼՂՀ հիմնանորոգման 2015թ. բյուջեի ծրագրի մեջ:

«Դպրոցի տարեգրության մեջ նշանակալի մեկ էջ եւս ավելացավ: Այցը արժեւորեց հարազատ կրթօջախի 20-ամյակը: Սա մեզ հպարտանալու առիթ է տալիս: Իսկ հպարտությունը բազմապատկվում է, երբ կողքիդ բարեկամ ունես, իսկ բարեկամ ձեռք բերելու ամենադյուրին ճանապարհը մեր ունեցածի, լավագույնի, մեր սրտի նվիրումն է»,- ասաց դպրոցի ուսուցչուհի Սիրվարդ Թամազյանը :

Դպրոցի վիճակը, մեղմ ասած, բարեկարգ չէր եւ այս օգնությունը ավելի քան անհրաժեշտ է դպրոցի անձնակազմին: Ահա այսպիսի խոսքեր էին հնչում համարյա բոլորի բերանից:

«Ոչ մի ուժ մարդուն չի դարձնում այնպես մեծ ու իմաստուն, ինչպես կոլեկտիվ, համերաշխ աշխատանքի ուժը: Անշուշտ այդ ուժը մենք ստանում ենք դպրոցում, որը մեր երկրորդ տունն է եւ դրանով մենք հպարտ ենք: Նաեւ նրանով, որ մեր դպրոցը կրում է Թեքեյան անունը: Մենք շնորհակալ ենք ԹՄՄ անդամներից եւ համակիրներից, որ սատարում են մեզ` նյութապես եւ, որ ամենակարեւորն էՙ բարոյապես», - ասաց պատմության ուսուցչուհի Կարինե Հովհաննիսյանը :

Իսկ դպրոցի տնօրեն Անահիտ Քոսակյանը բոլորին մաղթեց հաջողություններ իրենց աշխատանքային գործունեության մեջ` կարեւորելով նման հանդիպումների անհրաժեշտությունը , մարդասիրական արարքը, որով նրանք օրինակ են ծառայում մարդկանց եւ ցույց տալիս դեպի բարություն տանող ճանապարհը:

Եվ ահա, «Ուսուցիչ մը հովանավորէ» բարեգործական ակցիայի վերջին ակորդը Երեւանի Վահան Թեքեյանի անվան թիվ 92 հիմնական դպրոցն էր: Այս դպրոցն առանձնանում է մնացած չորսից նրանով, որ այս ծրագրի «առաջնեկն» է: Եվ ուսուցիչները յուրահատուկ ակնածանքով են վերաբերվում այդ փաստին, նույնիսկ շատերը խոսքի մեջ նշեցին, որ «հպարտանում են» այդ փաստով:

«Յուրաքանչյուր տարի բոլորը մեծ ոգեւորությամբ են սպասում այս բարեգործությանը, շատ մեծ սպասելիքներ են կապում այդ գումարի հետ, չնայած, գումարն այնքան էլ մեծ չէ, համենայն դեպս, ուսուցիչն այսօր ունի դրա կարիքը: Սա եւս մի խթանիչ եւ ոգեւորիչ գործոն է, որը տալիս է ուսուցչին աշխատելու, արարելու, ստեղծելու ձգտում»,- ասաց դաստիարակության գծով փոխտնօրեն Քրիստինե Հարությունյանը :

Գումարները բաժանելուց հետո ուսուցիչները հավաքվեցին ուսուցչանոցում, որպեսզի զրուցեն Մ. Նահանգներից ժամանած, Ամերիկայի եւ Կանադայի Թեքեյան մշակութային միության փոխնախագահ Երվանդ Ազատյանի հետ:

Իր խոսքի ընթացքում պարոն Ազատյանը շեշտեց, որ կարեւորը գումարի չափը չէ. «Ես հասկանում եմ, որ այսօրվա սոցիալական պայմաններում նվիրաբերված գումարն այնքան էլ մեծ չէ: Սակայն այս ամենը կարող էր եւ անանձնական կերպով արվելՙ ուղղակի ուղարկեին կտրոնները եւ վերջ: Սակայն կարեւորը շփումն է, անմիջականությունը»: Գումարները հանձնելիս պարոն Ազատյանը շնորհակալություն էր հայտնում ուսուցիչներինՙ նրանց կատարած աշխատանքի համար:

«Մենք հավատում ենք Հայաստանի ապագային: Այսօր դրսում ավելի շատ հայ կա, քան հենց Հայաստանում: Եվ եթե այդքան հայերով չկարողացան այս փոքրիկ Հայաստանն ապրեցնել, ապա ամոթ իրենց», ասաց Երվանդ Ազատյանը:

Զրույցի ընթացքում ուսուցիչներն իրենց երախտագիտության խոսքը հայտնեցին ԹՄՄ-ին, ոմանք նույնիսկ խոսեցին այն լեզուներով, ինչը դասավանդում ենՙ անգլերեն, ֆրանսերեն, ռուսերեն: Երվանդ Ազատյանը հատկապես ուրախացավ ռուսերեն ելույթից հետո, քանի որ, ինչպես ինքը խոստովանեց, ռուսերեն չգիտե, սակայն իր շնորհակալությունը հայտնեց հենց ռուսերեն լեզվով:

Հայոց լեզվի եւ գրականության ուսուցչուհի Գայանե Ղարիբյանը խոստովանեց, որ իրենց ավելի ապահով են զգում, երբ կա ԹՄՄ-ն. «Մենք ձեզ սպասում ենք ամեն տարի, եւ փառք Աստծո, որ մենք բոլորս էլ գիտակցում ենք, որ դա ոչ միայն գումարի համար է, այլ ձեր հետ հանդիպելու, ձեզ ունենալ մեր կողքին: Երկու մեծ նպատակ կա: Մեկը, որ մենք ձեզանով ավելի ապահով ենք զգում, եւ երկրորդը, «որ, անկախ տարիքից, չափազանց հաճելի է, երբ մարդու աշխատանքը գնահատում են: Մենք ձեզ սիրով սպասում ենք, տա Աստված, որ մենք էլ կարողանանք ձեզ էլ ինչ-որ բանով աջակից լինել»:

Մեզ հետ զրույցում, դպրոցի տնօրեն Ծովինար Մարդանյանը շեշտեց, որ, անկախ ամեն ինչից, ուսուցիչը նվիրյալ է, սակայն. «Սա օգնում է էլ ավելի եռանդով մոտենալ իր աշխատանքին»:

Այսքանով ավարտվեց «Ուսուցիչ մը հովանավորէ» բարեգործական ծրագրի 2014թ. արշավը: Հաջորդ տարի լրանում է ծրագրի 15 ամյակը: Երվանդ Ազատյանը խոստացավ, որ խորհրդանշական տարեդարձը կլինի ոչ պակաս խորհրդանշական անակնկալներով լեցուն:

 
 

«ԱԶԳ» ՕՐԱԹԵՐԹ #37, 21-11-2014

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ

ՄԵԿ ՏԱՐԻ ԱՌԱՋ