RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ

#130, 2013-07-30 > #131, 2013-07-31 > #132, 2013-08-01 > #133, 2013-08-02 > #134, 2013-08-03

«ԱԶԳ» ՕՐԱԹԵՐԹ #132, 01-08-2013



Ընթացիկ

Տեղադրվել է` 2013-07-31 23:03:03 (GMT +04:00)


Ընթերցված է` 1126, Տպվել է` 25, Ուղարկվել է էլ.փոստով` 23

ՆԱՎԹԻ ԵՎ ԳԱԶԻ ՈՐՈՆՈՒՄԻՑ ՄԻՆՉԵՎ ՏԱՎԱՐԻ ՄՍԻ ԱՐՏԱԴՐՈՒԹՅԱՆ ԱՎԵԼԱՑՈՒՄ

ԱՐԱ ՄԱՐՏԻՐՈՍՅԱՆ

Հայաստանի ընդերքում նավթի եւ բնական գազի առկայության հավանականությունը պահպանվում է, եւ կառավարությունը այս տարվա ընթացքում կկանոնակարգի դրանց երկրաբանական ուսումնասիրությունների եւ արդյունահանման նպատակով իրավունքի տրամադրման գործընթացը: Դա ընդգրկված է ՀՀ կառավարության 2013-ի գերակա խնդիրների եւ գործունեության միջոցառումների մեջ: Էներգետիկայի եւ բնական պաշարների նախարարությանը վերապահված խնդիրների թվում է հայկական ԱԷԿ-ի 2-րդ էներգաբլոկի շահագործման նախագծային ժամկետի երկարաձգման ծրագրի ներկայացումը, համաձայն որի, ֆինանսական միջոցներ կտրամադրեն գործող ատոմակայանի ժամկետի երկարացման աշխատանքների համար: Նախարարության այս տարվա խնդիրների թվում են Իրան-Հայաստան 400 կվ լարման էլեկտրահաղորդման օդային գծի կառուցումը, Վրաստան-Հայաստան տարանցիկ էներգափոխանակման վերաբերյալ համաձայնագրի կնքումը:

Բավականին հետաքրքրական են գյուղատնտեսության ոլորտում նախանշված խնդիրները: Մասնավորապես, նախատեսվում է տավարի դասական մսատու ցեղերի տոհմային կենդանիների ներկրման եւ տեղական տավարի հետ դրանց վերարտադրության ու տրամախաչման արդյունքում 32-40 կգ-ով ավելացնել մսի համար հանձնվող տավարի կենդանի զանգվածը: Դա հնարավորություն կընձեռի մինչեւ 2021-ը տավարի մսի տարեկան արտադրութան ծավալն ավելացնել 10-11 հազար տոննայով եւ հասցնել շուրջ 60 հազար տոննայիՙ ինչն ամբողջությամբ կբավարարի տավարի մսի ներքին սպառման պահանջարկը:

Գյուղատնտեսության նախարարությունը պետք է կառավարությանը ներկայացնի ձկնաբուծության զարգացման հայեցակարգը, համաձայն որի, 25-30 տոկոսով կնվազի ձկնարտադրության նպատակով օգտագործվող քաղցրահամ ջրի սպառումը եւ շուրջ 2 անգամ կավելանան ձկան արտադրության ծավալները: Հիշեցնենք, որ հատկապես Արարատյան դաշտում վերջին տարիներին ստորգետնյա ջրերի լուրջ նվազում է արձանագրվում եւ նման մոտեցումն ուղղակի հրատապ է:

Ջերմոցային տնտեսությունների զարգացման հայեցակարգով էլ նախատեսվում է առաջիկա 3-5 տարիների ընթացքում ջերմոցային տնտեսությունների տարածքն ավելացնել 15-20 տոկոսով: Մեկ այլ ծրագրի իրականացմամբ աշխատանքներ են տարվելու չօգտագործվող վարելահողերի տարածքները 3-5 տարվա ընթացքում 12-15 տոկոսով կրճատելու համար:

Տրանսպորտի եւ կապի նախարարության գերակա խնդիրն է լինելու հյուսիս-հարավ ճանապարհի կառուցումը: Մասնավորապես, կշարունակվեն տրանշ-1` Երեւան-Աշտարակ, Երեւան-Արարատ հատվածների, տրանշ-2` Աշտարակ-Թալին հատվածի շինարարական աշխատանքները, միջոցառումներ կիրականացվեն տրանշ-3` Թալին-Գյումրի հատվածի շինարարական աշխատանքների նախապատրաստման ուղղությամբ:

2014-ին էկոնոմիկայի նախարարությունը խոստանում է ապահովել Հայաստան միջազգային զբոսաշրջային այցելությունների թվի 10 տոկոս աճՙ 2013-ի համեմատ: Նախարարության 2014 թվականի «Զբոսաշրջությանն աջակցության ծառայություններ» ծրագրով, այդ նպատակին հասնելու համար նախատեսվում է միջազգային զբոսաշրջային շուկայում ներկայացնել Հայաստանի զբոսաշրջային արդյունքը (բացի դասական պատմամշակութայինից, նաեւ ձմեռային, առողջարանային, գյուղական, արկածային եւ այլ), երկարաձգել մեր երկրում զբոսաշրջային սեզոնը, կազմակերպել փառատոներ եւ այլ միջոցառումներ, մասնակցել 3 միջազգային հեղինակավոր զբոսաշրջային ցուցահանդեսներին:

Էկոնոմիկայի նախարարության գերակայությունների թվում են մնալու Հայաստանի գործարար միջավայրի բարելավումը, ՏՏ ոլորտում տեխնոլոգիական ձեռներեցությունը խթանող ենթակառուցվածքների զարգացումը, տնտեսության արտահանելի հատվածի ոլորտների ընդլայնումը` մասնավորապես արդյունաբերական քաղաքականության ռազմավարության շրջանակներում հաստատված ոլորտային ռազմավարությունների միջոցառումների ծրագրի իրագործումը:

«Երեւանի փոքր կենտրոնի կառուցապատման մասին» օրենքի նախագիծը եւս այս տարի կներկայացվի կառավարությանը: Հիշեցնենք, որ կառավարությունը արդեն հաստատել է Երեւանի փոքր կենտրոնի կառուցապատման հայեցակարգը: Օրենքի նախագծով ակնկալվում է Երեւանի կենտրոնի ճարտարապետական կերպարի միասնականության պահպանման, կառուցապատման, գեղագիտական միջավայրի կատարելագործմանն ուղղված քաղաքականության մշակում եւ իրագործում:

Քաղաքաշինության նախարարության մեկ այլ գերակա խնդիր է սոցիալական բնակարանային ֆոնդի ձեւավորման ռազմավարական ծրագրի մշակումը, ինչը ենթադրում է ցածր եւ միջին եկամուտ ունեցող ընտանիքների բնակարանային պայմանների բարելավման նպատակով սոցիալական բնակարանային ֆոնդի ձեւավորման իրավական հիմքերի, սկզբունքների, ուղղությունների ու ֆինանսավորման մեխանիզմների մշակումն ու հստակեցումը:

Շարունակվելու է «Երիտասարդ ընտանիքին մատչելի բնակարան» պետական նպատակային ծրագիրը, ընդ որում, կառավարությունը խոստանում է դրա պայմանների բարելավում եւ շահառուների թվի աճ:

Բնապահպանության նախարարությունը պարտավորվելու է մինչեւ տարեվերջ 300 հազար հատ գեղարքունի եւ ամառային իշխանի մանրաձուկ աճեցնել եւ բաց թողնել Սեւանա լիճ, ինչպես նաեւ իրականացնել «Արփի լիճ» ազգային պարկի ստեղծմանն ուղղված միջոցառումներ:

Արտակարգ իրավիճակների նախարարության այս տարվա գործունեության միջոցառումների թվում է սեյսմիկ պաշտպանության ծառայության Գառնիի երկրաֆիզիկայի դիտարանի վերագործարկումը:

Առողջապահության նախարարության խնդիրներից ուշագրավ է «Ցորենի ալյուրի հարստացման մասին» օրենքի նախագծի մշակումն ու կառավարություն ներկայացնելը: Օրենքի ընդունմամբ կներդրվի ցորենի ալյուրիՙ միկրոտարրերով եւ վիտամիններով պարտադիր հարստացման համակարգը, որի արդյունքում ակնկալվում է, որ կկրճատվեն կանանց եւ երեխաների սակավարյունության, բնածին արատով նորածինների ծնունդների, տղամարդկանց մոտ սրտի կաթվածի դեպքերը:

Երեւանում ոստիկանությունը կշարունակի ճանապարհային երթեւեկության վերահսկողության նպատակով տեսախցիկների եւ արագաչափերի տեղադրումը: Շուրջ 30 խաչմերուկներում կտեղադրվեն 120 տեսախցիկներ եւ 50 արագաչափ սարքեր, որոնց մի մասը` նաեւ միջպետական նշանակության ավտոճանապարհներին:

Սրանք կառավարության այս տարվա գերակա խնդիրների եւ գործունեության միջոցառումների մի մասն են միայն: Մնում է հուսալ, որ դրանք ամբողջությամբ կիրագործվեն ժամանակին եւ արդյունավետ կլինեն:

 
 

«ԱԶԳ» ՕՐԱԹԵՐԹ #132, 01-08-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ