RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
#019, 2013-02-15 > #020, 2013-02-16 > #021, 2013-02-19 > #022, 2013-02-20 > #023, 2013-02-21

«ԱԶԳ» ՕՐԱԹԵՐԹ #21, 19-02-2013



ԽԱՌՆԱԿ ՕՐԵՐ ՀԱԼԵՊԻ ՄԷՋ

Տեղադրվել է` 2013-02-19 00:34:06 (GMT +04:00)


Ընթերցված է` 1264, Տպվել է` 67, Ուղարկվել է էլ.փոստով` 70

ՄԵՐ ԿՐԹԱՐԱՆՆԵՐԸ

Հալէ՜պ, Հալէ՛պ: Զինարձակումները կը շարունակուին: Ռումբերու որոտները ցնցում կը պատճառեն ժողովուրդին, յատկապէս երեխաներուն: Սակայն երբ դուրս կու գաս բնակարանէդ կը տեսնես թէ մայթերը լեցուն են բազմութեամբ: Ինչպէ՞ս փակուած մնան վանդակի մէջ:

Կեանքը կը շարունակուի:

Հալէպի հայկական հինգ երկրորդական վարժարաններուՙ Քարէն Եփփէ ազգային ճեմարանի, Կիլիկեան վարժարանի, Կրթասիրացի, Հայ Աւետարարնական Բեթէլի եւ ՀԲԸՄիութեան Լազար Նաճարեան-Գալուստ Կիւլպենկեան վարժարանի դռները բաց են:

Ոմանց կայքը փոխուած է, դասաւանդութեան համար այլ տեղ ընտրած են, ըստ յարմարութեան:

Ահա կը մտնեմ այս ճեմարանի մանկապարտէզի բաժինը, նոյեմբերի 6-ին: Բողբոջ դասարանի մինինիկներէն յիսուն հոգի ներկայ են, ոմանք իրենց ծնողներուն հետ եկած են: Կը լուսանկարուինք խումբի մը հետ:

Կը շնորհաւորեմ այն ծնողները, որոնք երբ պատերազմական այս իրավիճակին մէջ անվտանգ անկիւն մը իսկ չկայ, իրենց զաւակները վստահած են այս վարժարանին:

Կը դիտեմ երեխաներուն վազվզուքը, իրարու հետ իյնալ-ելլելը, գործիքներն ի վեր ելլելն ու սահիլը... կը լսեմ ճիչերը, աղաղակները... Ամիսներէ ի վեր կարծէք բանտարկուած ըլլային, նոր շունչ մը կ՛առնեն, կը ցատկրտեն, կ՛աղմկեն.. Օ՜, երեխաներու հանած այդ աղմուկը, նոր երաժշտութիւն մըն է կարծէք...

Նախակրթարանի մասնաշէնքին մէջ եւս աշխուժութիւն մը կայ: Հոս աշակերտներուն թիւը 157- հասած է: Հոս եւս ծնողներու բազմութիւն մը կայ: Քաղաքին հեռու շրջաններէն ծնողներ կը փորձեն իրենց զաւակները արձանագրել տալ այսպիսի տարեշրջանի մը երբ դիպուկահարներ իրենց մարդասպանի դերը կը շարունակեն կատարել:

Բայց ահա հակառակ այս իրողութեան, միջնակարգի աշակերտներուն թիւը հասած է 135-ի: Բարձրագոյն դասարաններու աշակերտներու թիւն ալ 140-ի:

Ուրեմն ՀԲԸՄիութեան այս վարժարանը 2012-2013 տարեշրջանի համար ունի 500-ի մօտ աշակերտութիւն եւ դեռ օրէ օր կ՛աւելնայ աշակերտներուն թիւը: Մեղուի փեթակ մըն է դպրոցը, այս հայ դպրոցը, որ խաղաղ պայմաններուն իր գիրկին մէջ կ՛ունենար 1200-է աւելի աշակերտ-աշակերտուհի:

Պատերազմական պայմաններուն աշակերտութեան այս թիւը դպրոցին համար մխիթարական կը նկատեմ:

Դպրոցին աշակերտները առաւելաբար մօտիկ շրջապատէն եկողներ են: Հեռաւոր ու ստանգալից շրջաններու աշակերտները բացակայ են: Վախը համատարած է:

Բայց խօսուն թիւերը մեզի կ՛ըսեն, թէ կեանքը կը շարունակուի:

Դպրոցէն մէկ քայլ անդին ՀԲԸՄ-ի բարձրայարկ շէնքն է:

Հոս շուրջ քառասուն միութենականներ աշխատանքի լծուած են ու պատրաստած խաւաքարտէ մեծկակ տուփեր, նուիրաբաշխումը կրկնելու համար:

Երկու ամիս առաջ 2500 ընտանիքի օգնութեան հասած էին:

Այս անգամ դարձեալ նոյն 2500 ընտանիքներուն պիտի բաշխուին պատրաստուած տուփերը, զորս պիտի հասցնեն մինչեւ նպաստընկալներուն տուները, միութեան օթօպիւսերով:

Պատրաստող տղոցՙ աղջիկ ու մանչ, քաջալերական երկու խօսք կ՛ուղղեմ գնահատելով իրենց աշխատանքը:

Պատերազմը սուլող իր փամփուշտներով, որոտացող ռումբերով կը շարունակուի իր կեանք ու շէնքեր փլատակող ընթացքով եւ անոր քովն ի վեր շարունակուող կեանքով:

Մեր բոլոր կրթարաններու դռները բաց են, թող բաց մնան:

 
 

«ԱԶԳ» ՕՐԱԹԵՐԹ #21, 19-02-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ