RSS | FACEBOOK | NLA
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՈՐՈՆՈՒՄ | ԱՐԽԻՎ | ԹԵՄԱ | ՀԵՂԻՆԱԿՆԵՐ
#015, 2013-02-09 > #016, 2013-02-12 > #017, 2013-02-13 > #018, 2013-02-14 > #019, 2013-02-15

«ԱԶԳ» ՕՐԱԹԵՐԹ #17, 13-02-2013



ՌԱԿ-ԲԵՅՐՈՒԹ

Տեղադրվել է` 2013-02-12 23:27:34 (GMT +04:00)


Ընթերցված է` 2507, Տպվել է` 135, Ուղարկվել է էլ.փոստով` 95

ՀՊԱՐՏՕՐԷՆ ԶՕՐԱԿՑԵԼՈՎ ՀՀ ՆԱԽԱԳԱՀ ՍԵՐԺ ՍԱՐԳՍԵԱՆԻՆ

ՊԱՅԾԻԿ ԳԱԼԱՅՃԵԱՆ, Խմբագիր «Զարթօնք» օրաթերթի

22 տարիներ առաջ Հայաստանը վճռեց իր ճակատագիրը` ազգային մեր պատմութեան մէջ նոր անկիւնադարձ մը որդեգրելով, անկախութիւն ձեռք ձգելով: Այսօր Հայաստան հպարտութեամբ իր հայեացքը կը սեւեռէ իր ետին դրոշմուած այն ամէն ինչին զոր իրականացուցած է, շատ յաճախ դժուարագոյն պայմաններու մէջ, վերջին քսան տարիներու ընթացքին: Հայաստան դժուարութեամբ ժողովրդավարութիւն կերտած է, իրականացնելով նաեւ անցումը շուկայական տնտեսութեան ու վերագտած իր տեղը միջազգային բեմահարթակին վրայ:

Հայաստան այդ ամէնը յաջողեցաւ իրականացնել նաեւ շնորհիւ իր ժողովուրդի խիզախութեան եւ աշխատասիրութեան առանձնայատուկ որակներուն, որոնց համար համայն հայութիւնը արժանին կը մատուցէ: Այս բոլոր տարիներու ընթացքին Լիբանան եւ Հայաստան, որոնց կը միացնեն ամուր եւ դարաւոր կապեր, զարգացուցած ու հետեւողականօրէն խորացուցած են արդիւնաւէտ համագործակցութիւն շարք մը բնագաւառներու մէջ: Ահա թէ ինչու, յատկապէս վերջին հնգամեակին, շնորհիւ ՀՀ նախագահ Սերժ Սարգսեանի վարած դիւանագիտական մշակոյթին, Հայաստան կը վայելէ ոչ միայն Լիբանանի, այլեւ վստահութիւնն ու բարեկամութիւնը բազմաթիւ յառաջդիմած ու զարգացած երկիրներու, որոնք գործնապէս ալ ցոյց կու տան Հայաստանի կողքին իրենց ըլլալը, աջակցելու անոր` դիմակայելու ծառացած մարտահրաւէրները:

Սփիւռքահայ իրականութեան մէջ եզակի երեւոյթ կարելի է համարել նախաձեռնութիւնը երեկոյթի մը, ուր հոծ բազմութեամբ հայորդիներ ի մի հաւաքուելով իրենց երախտագիտութիւնը յայտնեն այն Հայաստանի նախագահին, որ կեանք մը ամբողջ մատուցած է անձնազոհութիւնՙ յանուն հող հայրենիին, նուիրումՙ ի սպաս ազգի ծառայութեան եւ հաւատքՙ իր ի գործ դրած այն մեծ ճիգերունՙ յաղթահարելու համար արտաքին աշխարհի հրամցուցած բոլոր մարտահրաւէրները:

Արդարեւ, ՌԱԿ Լիբանանի Շրջանային վարչութիւնը որդեգրելով խիզախ մտայղացումը, ուրբաթ 8 փետրուարին, «Փրոմենադ» հիւրանոցի շքեղ սրահին մէջ համախմբեց հոծ բազմութեամբ Հայաստանով տոգորուած հայորդիներ, որոնք խոր համոզումով եկած էին իրենց զօրակցութիւնը յայտնելու ՀՀ նախագահ Սերժ Սարգսեանին, յառաջիկայ փետրուարի 18ին կայանալիք նախագահական ընտրութիւններուն:

Երեկոյթը իրենց ներկայութեամբ պատուած էին Լիբանան հաստատուած դիւանագիտական ներկայացուցիչներ, Հայաստանի, Սբ Էջմիածնի եւ Սփիւռքի մէջ բազմաթիւ բարերարութիւններ ի գործ դրածՙ «Փիւնիկ» հիմնադրամի նախագահ Գաբրիէլ Չեմպերճեանը, Ռամկավար Ազատական կուսակցութեան Լիբանանի ղեկավար մարմինը, Թէքէեան մշակութային միութեան հիմնադիրներու մարմինը, ՀԲԸ Միութեան եւ ՀԵԸ-ի պատուական ղեկավարներ, ՌԱԿ-ի ի նպաստ Հայաստանի որդեգրած ուղեգիծին համախոհ քոյր կազմակերպութիւններ ու համակիր բարեկամներ:

Ընդունելի իրողութիւն էր այդ օր սրահին տարբեր տարազաւորումը, որ Մայր հայրենիք կը բուրէր: Հայաստանի դրօշը կը ծածանէր փայլքով մը տիրական, երբ հնչեց ազատ, անկախ ու հպարտ Հայաստանի հիմներգը: «Դէպի ապահով Հայաստան» լոզունգը եւ նախագահ Սերժ Սարգսեանի «Դէպի ապահով Հայաստան» պաստառը կ՛իմաստաւորէր օրուան խորհուրդը եւ մերթ ընդ մերթ կը ցուցադրուէր տեսերիզ մը, որ կը համադրէր Սերժ Սարգսեան բանասէրի, արցախեան ազատամարտիկի, ռազմական պաշտպանութեան ղեկավարի եւ վերջապէս ՀՀ նախագահի կեանքը:

ՌԱԿ Լիբանանի Շրջանային վարչութեան ատենապետ Յարութիւն Երկանեան , թարգմանը հանդիսանալով ռամկավար գաղափարախօսութեան, ներկաներուն յայտնեց նպատակը երեկոյթին: «Այսօր,- ըսաւ ան,- աննախընթաց երեկոյ մըն է, որ կը համախմբէ մեզ այս սրահին մէջ: Երեկոն նուիրուած է Հայաստանի Հանրապետութեան նախագահ, նախագահութեան թեկնածու Սերժ Սարգսեանի վերընտրման ընտրարշաւին: Այո՛, մենք համոզուած ենք, որ այս ձեռնարկին իմաստը շատ աւելի խորն է, քան անոր երեւոյթը:

Հզօր եւ ապահով պետականութիւն մը ունենալը նախապայման է ազգերու գոյատեւման եւ անոնց ընկերատնտեսական յառաջդիմութեան եւ բարգաւաճումին համար:

Մեր նախահայրերէն ժառանգած Հայրենիքին գոյատեւումը, մեր բոլորին հաւաքական պարտականութիւնն է զոր պէտք է կատարենք խոհեմութեամբ, հզօր եւ ամբողջական պահելու համար մեր ազգային պետութիւնը, հաւատքը, օրինականութիւնը, տնտեսական, գիտական ու մշակութային յառաջընթացը:

Ներկայ Հայաստանի Հանրապետութիւնը մեր նախահայրերուն հիմնած պետականութեան ժառանգորդն է: Պատահական չէ, որ հայրենի գերագոյն իշխանութիւնը կÿընթանայ իր նախնիներուն գծած ուղիով, առաւել եւս ծաղկեցնելով ու շէնցնելով զայն»:

Բոլոր ազգերն իրենց երկրին անկախութիւնը ձեռք ձգելու համար հզօրագոյն ճիգեր ներդրած, արիւն ու քրտինք թափելով գծած են իրենց ուղեգիծը: «Ասկէ աւելի քան 21 տարիներ առաջ, Հայաստանի անկախութեամբ մեր հայրենիքի վարչակարգը խորհրդային իշխանութենէն անցում կատարելով որդեգրեց ռամկավարական սկզբունքներ: Բան մըՙ որ ՌԱԿ-ը իր հիմնադրութեան օրերէն ի վեր կը ձգտէր ունենալ, պետականութիւն մըՙ հիմնուած ժողովրդավարական սկզբունքներու վրայ:

Այսօր, 22 տարիներէ ի վեր մեր ժողովուրդին կարեւոր մէկ հատուածը կÿապրի ազատ եւ անկախ Հայաստանի մէջ: Այս իրողութիւնը կÿապացուցէ, թէ մենքՙ մեր ճիգերով կերտած ենք մեր ներկանՙ նախանշելով ապագայի մեր ուղին: Դէպի անկախութիւն տանող մեր անցած ճանապարհները մի՛շտ ալ եղած են փշոտ, սակայն այդ փորձառութենէն քաղած մեր դասերը կոփած են մեզ ու դարձուցած աւելի՛ փորձառու եւ աւելի՛ ամուր:

Ամէն կասկածէ վեր է, որ մեզմէ իւրաքանչիւրին սիրտը կը ցաւի Հայաստանի համար, եւ կÿոգեւորուի անոր արձանագրած յաջողութիւններով: Բոլորս կը սիրենք մեր Հայրենիքը եւ բոլորս ալ պատրաստակամութիւն կը վերցնենք աջակցելու անոր շէնացման ու բարգաւաճման գործին մէջ:

Այսօր մենք պետականաշինութեան ճանապարհին յոյժ կարեւոր ժամանակահատուած մը շրջանցած ենք: «Անկախութեան 22 տարիներու ընթացքին կրցած ենք լրջագոյն յաջողութիւններ արձանագրել, որոնք հնարաւորութիւն կÿընձեռեն ընթանալու զարգացման անշրջելի ճանապարհով», կը յայտնէ ներկայ Հայաստանի պատուական նախագահը իր ընտրական ծրագրին մէջ»:

Հայաստանի անկախութեան հռչակումէն ետք մենք ունեցանք երեք պատուական նախագահներ, սակայն ՀՀ նախագահ Սերժ Սարգսեան կը բնորոշուէր այլ խորհուրդով մը: Անոր հայրենական կեանքի հանգրուանները անջնջելի կերպով դրոշմուած են արցախեան մայր հողին ընդերքը եւ որոգուած արիւն ու քրտինքով: Մեր պատմութեան ընթացքին միշտ ալ ձգտած ենք ունենալ ազգային բանակ: Ներկայիս շնորհիւ մեր մարտունակ բանակին, կÿապահովուի մեր Հայրենիքի անվտանգութիւնը, որովհետեւ ան առաջատար է նոյնիսկ շատ աւելի հարուստ երկիրներու բանակներէն:

Ընդունուած իրողութիւն է, որ մեր Հայրենիքը այսօր շրջափակուած է ատելավառ ոգիով լեցուն կարգ մը դրացիներով, որոնք վտանգ կը սպառնան ե՛ւ մեր ժողովուրդին եւ թէ՛ մեր հայրենիքին:

Մենք կը յայտարարենք, թէ ո՛չ մէկ ժողովուրդ եւ ո՛չ մէկ ազգ հայ ժողովուրդին կողմէ չ՛ընկալուիր որպէս թշնամի: Հայ ժողովուրդը կը պահանջէ իր հարեւան երկիրներէն դադրեցնելու բռնութեան եւ ատելութեան մղող քաղաքականութիւնը եւ առաջնորդուիլ միայն ու միայն խաղաղ բանակցութեամբ եւ խնդիրներուն խաղաղ լուծումներ գտնելու ճամբով:

Ամէն պարագայի, սակայն, Հայաստանի Հանրապետութեան շուրջ ձեւաւորուած ռազմաքաղաքական իրավիճակը եւ երկրին առջեւ ծառացած մարտահրաւէրները կը պահանջեն մեզմէ ունենալ մարտունակ, մշտապէս կատարելագործուող, ռազմական գիտութեան արդի ձեռքբերումները կիրառող զինուած ուժեր, որոնք յառաջիկայ 5 տարիներու ընթացքին ունակ ըլլան իրենց մարտունակութեամբ խաղաղութիւն պարտադրելու տարածաշրջանին մէջ»:

Բնական երեւոյթ է, որ Հայաստանի անկախութենէն ետք, մեր հայրենիքը ներգրաւուեցաւ միջազգային յարաբերութիւններու ոլորտին մէջ: Վերջին հնգամեակին, յատկապէս միջազգային ասպարէզի վրա ոստումներով լեցուն յաջողութիւններ արձանագրուեցան, կայունացան մեր միջազգային գործունէութեան իրաւական հիմքերը, ընդ որում հայրենի իշխանութիւններու ուշադրութեան կեդրոնը հանդիսացանՙ

1. - Անվտանգութեան արտաքին բաղադրիչներու ամրապնդումը:

2. - Արցախեան հիմնախնդիրի արդար եւ խաղաղ կարգաւորումը:

3. - Հայաստանի միջազգային քաղաքական եւ տնտեսական ներգրաւուածութեան ընդլայնումը

4. - Համազգային նշանակութիւն ունեցող խնդիրներուն հետամուտ ըլլալը եւ համայն հայութեան, յատկապէս սփիւռքահայութեան գերխնդիրըՙ Հայոց ցեղասպանութեան միջազգային ճանաչման եւ անոր հետեւանքներու վերացման գործընթացին նոր թափ հաղորդելը:

5. - Հայաստան-Թուրքիա յարաբերութիւններուՙ առանց նախապայմաններու կարգաւորման քաղաքական ուղեգիծին շարունակումը:

Մեզիՙ լիբանանահայերուս համար խիստ կարեւոր իրադարձութիւն էր ՀՀ նախագահ Սերժ Սարգսեանի այցը Լիբանան: Լիբանանի նախագահ Միշել Սըլէյմանի հետ ան առիթ ունեցաւ քննարկելու տարածաշրջանի ճգնաժամային պայմանները, որոնք քաղաքական քննարկումներու ծիրէն ներս կարեւոր տեղ կը զբաղեցնեն: Այցը կը սատարէր նաեւ Երեւան-Պէյրութ միջպետական յարաբերութիւններու առաւել աշխուժացման, ընդ որում բազմաթիւ պայմանագրեր կնքուեցան մեր երկու երկիրներուն միջեւ»:

ՌԱԿ Լիբանանի Շրջանային վարչութեան ատենապետ Յարութիւն Երկանեան իր խօսքի ավարտին եզրակացուց. «Մեր պատմութեան ընթացքին, լիբանանահայերս շնորհիւ մեր մեծ ներուժին, միշտ ալ լիարժէք եւ արդիւնաւէտ կերպով գործած ենք «Յանուն Հայրենիքի» նշանաբանով, ընդ որումՙ հնարաւորութիւն ունեցած ենք արձանագրել նորանոր յաջողութիւններ հայ-լիբանանեան յարաբերութիւններու զարգացման, Հայոց ցեղասպանութեան ճանաչման եւ դատապարտման, համազգային միւս գերխնդիրներու լուծման ճանապարհին:

Մենքՙ Ռամկավար Ազատականներսՙ միշտ ալ եղած ենք Հայաստանի կողքին, ըլլայ Խորհրդային Հայաստանի տարիներուն եւ թէ՛ 21-ամեայ անկախ Հանրապետութեան բոլոր դժուարին պահերուն: Արցախեան գոյամարտի, երկրաշարժի, արհաւիրքներու դժուար օրերուն զօրավիգ հանդիսացած ենք ու սատարած Հայաստանին ու Արցախին, նպաստա՛ծ ենք մեր Մայր հայրենիքի կայացման, աջակցա՛ծ ենք երկրի տնտեսաքաղաքական յառաջընթացին:

Այսօր պահն է զօրակոչի ենթարկելու մեր հայրենասիրական զգացումները եւ առաւել եւս ուժգնօրէն ցուցաբերելու մեր հետաքրքրութիւնը հանդէպ մեր Հայրենիքին, առաւե՛լ եւս կառչածութիւն, վստահութիւն եւ խոր հաւատք տածելու մեր օրէ օր ծաղկող Հայաստանին»:

Այո՛, միայն այս հաւատքով է որ միասնաբար կրնանք ընթանալ դէպի պայծառ ապագան, ունենալու համար գերհզօր Հայրենիք եւ ապահով Հանրապետութիւն:

Միայն այս հաւատքով է որ մենք կրնանք ձգտիլ մեր Մեծ երազինՙ ամբողջական Հայաստանին:

 
 

«ԱԶԳ» ՕՐԱԹԵՐԹ #17, 13-02-2013

Հայկական էկեկտրոնային գրքերի և աուդիոգրքերի ամենամեծ թվային գրադարան

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ԱԶԴԱԳԻՐ