AZG Daily #35, 22-09-2017

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ

 RSS | WAP | FACEBOOK | PDF | PDF-Culture    
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ
ՀԵՂԻՆԱԿՆԵՐ | ԾԱՂՐԱՆԿԱՐՆԵՐ
ՀԱՅԵՐԵՆԸ ԱՓԻ ՄԵՋ` ԶՐՈՒՅՑ 64. ԼԻՆԵՆՔ ԱՌԱՔԻՆԻ, ՊԱՐԿԵՇՏ, ԱԶՆԻՎ ԵՎ ԲԱՐԻ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#031, 2017-08-25 > #032, 2017-09-01 > #033, 2017-09-08 > #034, 2017-09-15 > #035, 2017-09-22

«ԱԶԳ» ՕՐԱԹԵՐԹ #33, 08-09-2017



Տեղադրվել է` 2017-09-07 22:58:32 (GMT +04:00)


Ընթերցված է` 7537, Տպվել է` 1792, Ուղարկվել է էլ.փոստով` 0

ՀԵՐԹԸ ՀԱԿԱԿԱՐԿՏԱՅԻՆ ՑԱՆՑԵՐԻՆՆ Է

Ա. Մ.

Որքա՞ն է կազմելու պետական սուբսիդավորումը եւ ի՞նչ տոկոսադրույքներով են վարկերը հասնելու գյուղացիական տնտեսություններին

Հայաստանում գյուղատնտեսության բարձր ռիսկայնության երկու գլխավոր պատճառներից մեկը կարկուտն է: Եթե ցրտահարության դեմ գործնականում անհնար է պայքարել եւ միայն կորուստները որոշ չափով կարելի է նվազեցնել, ապա կարկուտի վնասները հնարավոր է հասցնել զրոյի: Կարկուտի վնասների դեմ պայքարի միջոցներից բավականին բարձր են գնահատվում հակակարկտային ցանցերը: Դրանց կիրառումը զարգացած տնտեսություն ունեցող երկրներում բավականին տարածված է: Հայաստանում նույնպես դրանք կիրառվում են, բայց առայժմ փոքր տարածքների վրա: Չնայած գրեթե 100 տոկոս արդյունավետությանը, ներկայումս մեր երկրում միայն 60-70 հա տարածքներում են տեղադրված կարկտապաշտպան ցանցեր: Հիմնական պատճառը դրանց թանկ լինելն է ու գյուղացիական տնտեսությունների կողմից բավարար միջոցների բացակայությունը: Այս առումով, դրական տեղաշարժ պետք է համարել կառավարության կողմից գյուղատնտեսությունում հակակարկտային ցանցերի ներդրման նպատակով վարկերի տոկոսադրույքները սուբսիդավորելու որոշումը: Այդ նպատակով, արդեն եկող տարի նախատեսված է մոտ 700 մլն դրամ հատկացնել:

Մասնավորապես, կառավարությունը վերոնշյալ գումարն ուղղելու է վարկիՙ տարեկան 14 տոկոս կազմող տոկոսադրույքի մեծ մասի սուբսիդավորմանը, որի արդյունքում տնտեսվարողների համար վարկի տոկոսադրույքը կկազմի ընդամենը 2 տոկոս տոկոսադրույքովՙ 7 տարի ժամկետով: 700 մլն դրամ գումարով վարկերի տոկոսադրույքների սուբսիդավորումը հնարավորություն կտա տարեկան սուբսիդավորել 1350 հա, այդ թվում`1000 հա խաղողի եւ 350 հա պտղատու այգիների հակակարկտային ցանցերի ներդրման համար տրամադրված վարկերի տոկոսադրույքը: Արդյունքում, հանրապետության այգիների շուրջ 2,4 տոկոսը կպատվի կարկտապաշտպան ցանցաշերտերով, բացառելով կարկուտի ռիսկը: Միանշանակ է, որ հետագայում այս ձեւով պաշտպանված գյուղատնտեսական տարածքները անհրաժեշտ է ընդլայնել:

Պատկերացում կազմելու համար, թե ի՞նչ վնասներ է կրում գյուղատնտեսությունը կարկտահարությունից, ներկայացնենք վերջին տարիների պատկերը: 2013-ին մայիսին Արմավիրի մարզում կարկտահարության հետեւանքով 11090 հա ցանքատարածություններին, պտղատու եւ խաղողի այգիներին հասցված վնասը կազմել է շուրջ 25,3 մլրդ դրամ: 2014-ին Հայաստանի Լոռու եւ Շիրակի մարզերում վնասվել են 52 համայնքների 15101 հա ցանքատարածություններ: Վնասըՙ 6,7 մլրդ դրամ: 2015-ին կարկտահարության հետեւանքով վնասվել են հանրապետության 8 մարզի 82 համայնքի շուրջ 8,8 հազար հա ցանքատարածություններ, իսկ վնասը կազմել է շուրջ 7,8 մլրդ դրամ: 2016-ին կարկտահարությունը վնասել է 9 մարզի150 համայնքի շուրջ 23,1 հազար հա մշակվող տարածություններ, վնասը` շուրջ 33,6 մլրդ դրամ: Այսինքն, ըստ կառավարության ներկայացրած հիմնավորման, յուրաքանչյուր տարի կարկուտի պատճառով վնասվում են հանրապետության այգետարածքների 10-15 տոկոսը, իսկ կարկտահարված տարածքներում բերքի կորուստը որոշ դեպքերում կազմում է 80-100 տոկոս:

Կարկտապաշտպան ցանցերի ներդրման արդյունավետությունը արդարացված է նաեւ դրանց գնի եւ ներդրման արդյունքում ստացվող անկորուստ բերքի համեմատության հաշվարկներով: Համաձայն դրանց, կարկտահարությունից տարեկան բերքի 45 տոկոս կորստի դեպքում, վնասի չափը հակակարկտային ցանցերի սուբսիդավորման ծրագրի իրականացման ժամանակահատվածում (7 տարի) ավելի քան 2,6 անգամ գերազանցում է հակակարկտային ցանցի ձեռք բերման եւ տեղադրման ծախսերը, իսկ բերքի 30 տոկոս կորստի դեպքումՙ վնասի չափը շուրջ 75 տոկոսով է գերազանցում հակակարկտային ցանցերի տեղադրման ծախսերը:

Եթե նկատի ունենանք, որ գյուղատնտեսության համախառն արտադրանքի մոտ 75 տոկոսը հենց բուսաբուծության արտադրանքն է, ապա ակնհայտ է դառնում, որ այս ծրագրի իրականացումը, իսկ ապագայում նաեւ ընդլայնումը, էական ազդեցություն կունենան գյուղատնտեսության ընդհանուր ցուցանիշների վրա :

Միաժամանակ, հարկ է չմոռանալ նաեւ կարկուտի դեմ պայքարի այլ ուղղությանՙ հրթիռահրետանային հակակարկտային համակարգի ներդրման մասին, աստիճանաբար ազատվելով ցածր արդյունավետություն ունեցող գազագեներատորային հակակարկտային համակարգից: Համակարգ, որի անարդյունավետ լինելու մասին բարձրաձայնել էինք դրա ներդրման առաջին իսկ տարիներից («Անտրամաբանական մոտեցում հակակարկտային համակարգի ընտրության հարցում», «ԱԶԳ», 22.07.2009 թ.):

 
 

«ԱԶԳ» ՕՐԱԹԵՐԹ #33, 08-09-2017


© AZG Daily & MV, 2009, 2011, 2012, 2013 ver. 1.4
ARMINCO Global Telecommunications Геноцид армян Analitika.at.ua.