AZG Daily #43, 17-11-2017

ԱԶԳ-Ը ԱՌԱՋԱՐԿՈՒՄ Է ԳՐԱՀՐԱՏԱՐԱԿՉԱԿԱՆ ԾԱՌԱՅՈՒԹՅՈՒՆՆԵՐ

ՀԱՅՈՑ ՑԵՂԱՍՊԱՆՈՒԹՅԱՆ 100-րդ ՏԱՐԵԼԻՑ

Armenian Genocide

«ԱԶԳ» ՕՐԱԹԵՐԹԻ ՆՈՐ ՀԵՌԱԽՈՍԱՀԱՄԱՐՆԵՐՆ ԵՆ

ԱԶԴԱԳԻՐ

 RSS | WAP | FACEBOOK | PDF | PDF-Culture    
ԳԼԽԱՎՈՐ | ՄՇԱԿՈՒՅԹ | ԸՆՏՐԱՆԻ | ՄԵՐ ՄԱՍԻՆ | ՈՐՈՆՈՒՄ | ԱՐԽԻՎ | ԹԵՄԱ
ՀԵՂԻՆԱԿՆԵՐ | ԾԱՂՐԱՆԿԱՐՆԵՐ
ՀԱՅԵՐԵՆԸ ԱՓԻ ՄԵՋ` ԶՐՈՒՅՑ 93. ՊԱՐԵԳՈՏ
ԲԱԺԱՆՈՐԴԱԳՐՎԵՔ «ԱԶԳ»ԻՆ
ԼՈՒՅՍ Է ՏԵՍԵԼ "ԱԶԳ-ՄՇԱԿՈՒՅԹ" ՀԱՎԵԼՎԱԾԻ ՀԵՐԹԱԿԱՆ ՀԱՄԱՐԸ
#004, 2017-02-03 > #005, 2017-02-10 > #006, 2017-02-17 > #007, 2017-02-24 > #008, 2017-03-03

«ԱԶԳ» ՕՐԱԹԵՐԹ #6, 17-02-2017



ՕՐԱԿԱՐԳ

Տեղադրվել է` 2017-02-17 02:34:53 (GMT +04:00)


Ընթերցված է` 4641, Տպվել է` 484, Ուղարկվել է էլ.փոստով` 0

ՆԱՐԵԿ ՎԱՆԻ ԶԱՐՄԱՆԱՀՐԱՇ ԱՇԽԱՏԱՆՔՆԵՐԻ ՑՈՒՑԱՀԱՆԴԵՍԸ ՊՐԱՀԱՅՈՒՄ

ՀԱԿՈԲ ԱՍԱՏՐՅԱՆ, Պրահա

Չեմ հիշում, որ անցած քսան տարիների ընթացքում որեւէ հայաստանաբնակ նկարիչ իր անհատական ցուցահանդեսով ներկայանար Պրահայում: Չեխաբնակ հայ նկարիչները հաճախ են ունեցել նման ցուցահանդեսներ: Բայց երիտասարդ շնորհալի նկարիչ Նարեկ Վանն առաջինն է, ում ցուցահանդեսը բացվեց փետրվարի 15-ին Պրահայի կենտրոնում գտնվող «Յակուբսկա» պատկերասրահումՙ քաղաքական հայտնի դեմքերի, դիվանագետների ու արվեստի գործիչների ներկայությամբ: Ցուցահանդեսի կազմակերպիչներիցՙ Չեխիայում Հայաստանի դեսպան Տիգրան Սեյրանյանն իր բացման խոսքում նախ ներկայացրեց Նարեկին, ով ծնվել է 1985 թվականին Երեւանում, 1915 թվականի ցեղասպանությունից վերապրածների ընտանիքում, որոնց արմատները հասնում են Վան: «Նա շարունակում է իր պապիՙ Հայաստանի անվանի գեղանկարիչ Հովհաննես Շարամբեյանի ավանդույթները, ինչի վկայությունն է այս հրաշալի պատկերասրահում բացված ցուցահանդեսը»,- ասաց դեսպանը:

Նարեկ Վանի (Աշուղաթոյան) «Շարժվող հատվածներ» ցուցահանդեսը լիովին արտահայտում է նրա ընտրած մոգական ռեալիզմի ուղղությունը, թեեւ ինքը դժվարանում է իրեն դասել որեւէ ուղղության: Դեսպան Սեյրանյանի գնահատմամբ, Նարեկը ստեղծել է իր երեւակայական Նարեկավան քաղաքը, որի հետ շատ աղերսներ ունի Չեխիայի գեղեցիկ մայրաքաղաքը, ուր պատմական քաղաքի գույները զուգորդվում են ժամանակակից Պրահայի կենտրոնի հետ: «Այս աշխատանքներում ես տեսա չեխական Տելչ քաղաքը եւ այլ քաղաքներ: Այսպիսով Նարեկը նաեւ կամուրջ է ստեղծել Հայաստանի եւ Չեխիայի երեւակայական քաղաքների միջեւ: Սա է նրա արվեստի իմ ընկալումը, ինչպես յուրաքանչյուրը կարող է ունենալ իր սեփական գնահատականը»,- եզրափակեց դեսպանը, շնորհակալություն հայտնելով նաեւ «Յակուբսկա» պատկերասրահին եւ ձեռնարկի մյուս հովանավորներին հրաշալի ցուցահանդեսի համար:

Նարեկ Վանն էլ իր հերթին շնորհակալություն հայտնեց Հայաստանի դեսպանությանը եւ պատկերասրահին, որ հնարավորություն տվեցին իր մոտ 30 աշխատանքները Պրահայում ցուցադրելու եւ զգալու եվրոպական արվեստասեր հասարակության գնահատականը:

«Յակուբսկա» պատկերասրահի տնօրեն, գեղանկարիչ Ալեքսանդր Օնիշենկոն իր խոսքում շատ հակիրճ էր. «Շնորհակալություն Նարեկին նման բարձրարվեստ գործերի համար»:

Այնուհետեւ ներկաները մեծ հետաքրքրությամբ դիտեցին Նարեկի պատրաստած տեսահոլովակը, որը նրա աշխատանքների անիմացիոն ներկայացումն էրՙ Երեւանի իրական պատկերների եւ իր գեղանկարչական աշխատանքների զուգորդմամբ:

Ցուցահանդեսի ընթացքում դասական գործերի կատարումներով հանդես եկավ «Սարգսյան» լարային քառյակը: Հաճելի էր տեսնել, երբ բազմալեզու արվեստասերները գինու բաժակը ձեռքներին շրջում էին պատկերասրահի սրահներում եւ զմայլվում Նարեկի լուսավոր, հեքիաթային եւ միաժամանակ լիովին արդիական աշխատանքերով: Իսկապես, Նարեկ Վանի արվեստը բազմաշերտ է. այն մի քանի հստակ մոտեցումների համադրություն է, որում մեծ տեղ ունեն գիծը, գույնը, զարդանախշը, մոգականությունն ու բանաստեղծականությունը: Եվ ամենակարեւորը, որ նկատելի էր, բոլոր գործերը կատարված էին մանրակրկիտ նվիրվածությամբ, հենց այնպես արված աշխատանք չկար:

Նարեկի պապի ազդեցությունն իրոք մեծ է նրա արվեստի վրա: Այդ արվեստի ազդեցությունը զգացվում է նաեւ մատաղ սերնդի աշխատանքներում: Իզուր չէ, որ չեխական Լիդիցեում անցկացվող ամենամյա մանկական միջազգային ցուցահանդեսում Դիլիջանի Շարամբերյանի անվան գեղարվեստի դպրոցի սաները մշտապես արժանանում են լավագույն մրցանակների:

Մեզ հետ զրույցում 1994 թվականից գործող «Յակուբսկա» պատկերասրահի տնօրեն, ուկրաինացի գեղանկարիչ Ալեքսանդր Օնիշչենկոն մանրամասնեց, որ իրենց նպատակն էր նաեւ հեռավոր Հայաստանի ներկայացուցիչներին ցուցադրել:

Երբ ինձ ներկայացրին աշխատանքները, զարմացա, վաղուց ես նման որակով աշխատանք չէի տեսել: Գլխարկս հանում եմ նրա արվեստի առաջ: Նա առաջին հայ նկարիչն է, որ մեզ մոտ ներկայացվում է անհատական ցուցահանդեսով,- խոստովանեց գեղանկարիչը: Չի բացառվում, որ հետագայում նաեւ Ալեքսանդրի նկարները ցուցադրվեն Հայաստանում:

Վերջում նշենք, որ Galerie Jakubska պատկերասրահում հայ նկարչի անհատական ցուցահանդեսը կգործի փետրվարի 16-21-ը: Այստեղ կարող եք գնել ոչ միայն նրա նկարները, այլեւ դրանց պատկերներով բացիկների գեղեցիկ հավաքածուն:

 
 

«ԱԶԳ» ՕՐԱԹԵՐԹ #6, 17-02-2017


© AZG Daily & MV, 2009, 2011, 2012, 2013 ver. 1.4
ARMINCO Global Telecommunications Геноцид армян Analitika.at.ua.