ՀԱՅ 7 ԲՌՆՑՔԱՄԱՐՏԻԿՆԵՐ ԿՊԱՅՔԱՐԵՆ ՈՒՂԵԳՐԵՐԻ ՀԱՄԱՐ Բռնցքամարտի Հայաստանի ազգային հավաքականի գլխավոր մարզիչ Կարեն Աղամալյանը հրապարակել է այն բռնցքամարտիկների ցանկը, որոնք հանդես կգան ապրիլի 13-22-ը Թուրքիայի Տրապիզոն քաղաքում կայանալիք վարկանիշային մրցաշարում: Օլիմպիական ուղեգրերի համար ռինգ դուրս կգան հայաստանցի 7 բռնցքամարտիկներՙ Կորյուն Սողոմոնյանը (49 կգ), Հովհաննես Դանիելյանը (52 կգ), Արամ Ավագյանը (56 կգ), Վլադիմիր Սարուխանյանը (60 կգ), Արա Պուլուզյանը (64 կգ), Հրայր Մաթեւոսյանը (69 կգ) եւ Արթուր Խաչատրյանը (81 կգ): Տրապիզոնում քաշային 10 կարգերում կխաղարկվեն Լոնդոնի օլիմպիական խաղերի 26 ուղեգրեր: Ընդ որում քաշային տարբեր կարգերում ուղեգրերի թիվը տարբեր է: Առավելագույն քանակի ուղեգրեր (4-ական) կվիճարկվեն մինչեւ 49, 56 եւ 60 կգ քաշային կարգերում: 52 եւ 81 կգ քաշային կարգերում Լոնդոն մեկնելու իրավունք կստանան 3 ուժեղագույնները: 69 կգ քաշային կարգում 2 ուղեգրերը բաժին կհասնեն եզրափակիչ մտած բռնցքամարտիկներին: Իսկ ահա մինչեւ 64 կգ քաշային կարգում միայն հաղթողն ուղեգիր կնվաճի: ՀՀ հավաքականի գլխավոր մարզիչ Կարեն Աղամալյանի կարծիքով, եթե հաջողվի 1-2 ուղեգիր նվաճել, ապա դա լավ արդյունք կհամարի: Մեր բռնցքամարտիկները Տրապիզոնի մրցաշարին նախապատրաստվել են Աբովյանում: Այսօր հավաքականը կմեկնի Թբիլիսի, որտեղից էլ ինքնաթիռով կուղեւորվի Ստամբուլ: | 
