ՀԱՅԱՍՏԱՆՈՒՄ ԾԽՈՒՄ Է ՏՂԱՄԱՐԴԿԱՆՑ ԿԵՍԻՑ ԱՎԵԼԻՆ Ի. Պ. Ծխելուց առաջացած հիվանդություններից Հայաստանում տարեկան 3-4 հազար մարդ է մահանում: Առողջապահության նախարարության հանրային առողջության բաժնի պետ Արտեմ Բազարչյանի խոսքով` ծխելուց առաջացած հիվանդություններն ի հայտ են գալիս ծխելուց 10-15 տարի անց: Դրանցից տարածված են հատկապես թոքի քաղցկեղն ու սրտանոթային հիվանդությունները: Հայաստանում ծխում է տղամարդկանց 52-55 տոկոսը, անուամենայնիվ, երեկ լրագրողների հետ հանդիպման ժամանակ Արտեմ Բազարչյանը հուսադրեց, որ ծխող տղամարդկանց թիվը վերջին 10 տարիներին նվազել է` 10 տարի առաջ 60 տոկոս էր: Ըստ նրա` ծխող կանանց թիվն ավելի քիչ է, սակայն կանանց շրջանում ավելի շատ ծխում են երեւանաբնակները, քան մարզերում ապրողները: Երեւանում 35-55 տարեկան կանանց մեջ 6-7 տոկոսը կազմում են ծխողները: Ինչ վերաբերում է ծխելու դեմ պայքարի օրենսդրական մեխանիզմներին, ապա հիշեցնենք, որ Հայաստանը նույնպես ունի հակածխախոտային օրենք, սակայն օրենքը խախտողների հանդեպ պատժիչ միջոցներն արդյունավետ չեն, պայքարն էլ, ինչպես տեսնում ենք, ոչ հետեւողական: Անհրաժեշտ է հետեւել, որ հասարակական վայրերում ծխելու արգելքը պահպանվի` հաշվի առնելով, որ ծխողների կողքին պարբերաբար գտնվող չծխողները, եւս ռիսկային խմբում են, հատկապես երեխաները: | 
