ՀԱՅ ՇԱԽՄԱՏԻՍՏՆԵՐԸ ՀԱՎԱԿՆՈՒՄ ԵՆ ՄՐՑԱՆԱԿՆԵՐԻ Շախմատի «Աերոֆլոտի» մրցաշարի ավարտից մեկ տուր առաջ ուժեղագույնների խմբում հանդես եկող Հրանտ Մելքումյանը հավակնում է մրցանակային տեղի: 8-րդ տուրում նա սեւերով ոչ-ոքի խաղաց Եվգենի Տոմաշեւսկու հետ: Մելքումյանը 5,5 միավորով 5-րդ տեղում է: 6-ական միավորով աղյուսակը գլխավորում են ուկրաինացիներ Անտոն Կորոբովն ու Պավել Էլյանովը, լեհ Մաթեուշ Բարտելը: Ուժեղագույնների խմբում հանդես եկող հայաստանցի մյուս 2 շախմատիստներն էլ խաղերն ավարտեցին ոչ-ոքի արդյունքով: Վլադիմիր Հակոբյանը հաշտություն կնքեց ուկրաինացի Յարոսլավ Ժերեբուխի հետ, իսկ Կարեն Գրիգորյանը միավորը կիսեց Էլթաջ Սաֆարլիի հետ մրցավեճում: Գրիգորյանը 5 միավորով 22-րդ տեղում է, իսկ Հակոբյանը 4,5 միավորով 32-րդ հորիզոնականն է զբաղեցնում: B խմբի մրցաշարում հայ շախմատիստներից լավագույն արդյունքն ունեն Հովիկ Հայրապետյանն ու Հովհաննես Գաբուզյանը, որոնք վաստակել են 5,5-ական միավոր: Նրանք հաշտություն կնքեցին համապատասխանաբար Ստանիսլավ Բոգդանովիչի եւ Դմիտրի Օբոլենսկիխի հետ: 5 միավոր ունի Տիգրան Քոթանջյանը, որը հաղթեց Ալեքսանդր Կրապիվինին: 4,5-ական միավոր են վաստակել Վահե Բաղդասարյանն ու Արտաշես Մինասյանը, 4ՙ Դավիթ Պետրոսյանը, 3ՙ Մանուել Պետրոսյանը, 1,5ՙ Աղասի Ինանցը: 5,5-ական միավորով աղյուսակը գլխավորում են ռուսաստանցիներ Ալեքսանդր Շիմանովը, Գրիգորի Օպարինը եւ Վլադիմիր Դոբրովը: | 
